Kaneva_O_—_kopiya.jpg

Ылын-ылын, ӧти ыджыд козъя яг бокын, оліс-выліс мырпом. Орччӧн нинӧм эз вӧв, сӧмын яг да нюр. Сылы вӧлі сэтшӧм гажтӧм, мый быд рыт бӧрдіс.

Ӧтчыд чоя-вока, Катя да Вова, мӧдӧдчисны ягӧ вотӧсла. Кор мырпомыс аддзис найӧс, заводитіс радлыны, мый сійӧ сэсся абу нин ӧтнас. Сэтчӧдз радліс, мый эз и казяв, кыдзи сюрис кӧрзинаӧ. И сэки заводитчисны сылӧн тешкодь лоӧмторъясыс...

Локтісны чоя-вока гортӧ, петкӧдлісны кӧрзинасӧ мамыслы.

— Молодечьяс, кутшӧм менам уджач челядь. Локтӧй, пуам варенньӧ,— шуис мам.

— Ладнӧ. Ми радпырысь тэныд отсалам,— вочавидзисны челядь.

Мыйӧн мырпом кыліс, мый сыысь кӧсйӧны пуны варенньӧ, ӧдйӧ и петіс кӧрзинаысь да дзебсис пач улӧ.

Пач улас пукаліс шыр. Аддзис сійӧ мырпомсӧ, кӧсйис сёйны. Коньӧр мырпом ӧдва мездысис сы лапаясысь да котӧрӧн дзебсис гӧлик сайӧ.

Nesterov_Andrei.jpg

Но тані сійӧс виччысис руд кань. Мырпом аддзис каньсӧ да повзьӧмысла уськӧдіс гӧликсӧ. Гӧликыс усис кань вылӧ, а мырпом сэккості котӧртіс ӧшинь улӧ, ӧшинь увсянь керкадорса юкмӧс сайӧ. Сэки сы бокті котӧртіс руд каньыд.

Мырпом котӧртіс водзӧ. Керка сайысь казяліс важ коз.

— Дона пуӧй, дзеб менӧ, — корис мырпом.

— Ладнӧ, — шуис козйыд да дзебис сійӧс лысъяс улас.

Каньыс бара котӧртіс сы бокті. Мырпом нӧшта ӧтчыд аттьӧаліс козсӧ, ӧдйӧджык котӧртіс потшӧс сайӧ, а сэсся эрд вывті да ягӧ. Видзӧдліс бӧрас, кодкӧ вӧтчӧ-ӧ оз сы бӧрся, сы вӧсна эз и казяв туй вывсьыс неыджыд мыр да став вынсьыс люкасис сыӧ.

— Колӧ видзӧдны, кытчӧ мунан! — скӧрысь горӧдіс мыр.

— Ой, кора прӧща, пӧжалуйста.

— Коді тэ да кытчӧ сідзи котӧртан?

— Ме мырпом. Олі ӧтнам ягын, нюр вылын, и вӧлі меным гажтӧм. Со ме и думышті аддзыны аслым ёртӧс, но менам нинӧм эз артмы. Ставыс менӧ сӧмын кедзовтӧны. А тэ коді?

— Ме мыр. Ме тані ӧтнам жӧ ола, меным пыр гажтӧм, — шуис мыр.

— А кӧсъян, ме тэ дорӧ кольчча?

— Кӧсъя! — нимкодьпырысь горӧдіс мыр.

И сэксянь кутісны найӧ овны да вывны кыкӧн.

Серпасыс Андрей НЕСТЕРОВЛӦН