Ответьте нам

Друзья, в этом году исполняется 75 лет сказу Павла Бажова «Голубая змейка». Как вы думаете, что не нравилось голубой змейке в людях?

Дата публикации: 03.05.2020

Беседует Алёна Нестерова

Перевод интервью (см. тут)


0qXqzjKKBwQ.JPG

– Генрих, бур рыт! Тэ бӧръя кадӧ уналаын петкӧдчан кыдз блогер: Юношескӧй библиотекаын гӧсьтӧн вӧлін, Коми йӧзӧдчан керкалы отсасян – гижысьяскӧд сёрнитан налӧн небӧгъяс йылысь, телевизор пыр ӧнтайя петкӧдчылін. Кор локтіс кӧсйӧмыс блогеравнысӧ?

– Блогерствоӧн ноксьӧмыс ачыс ньӧж да вӧляӧн кыдзкӧ артмис. Медводз камера козьналісны бать-мам. А сэсся водзӧ уджыс ачыс кутіс мунны. Ме зіля татшӧм ногӧн отсавны коми культура сӧвмӧдны, сійӧн, гашкӧ, и корӧны быдлаӧ.

– Кутшӧм нырвизьын уджалан? Кысь корсян мӧвпсӧ, шуам, Ыджыд тышлы цикл дасьтігӧн?

– Ӧні ме нуӧда кык проект: «Коми литература в YouTube» да «Дети войны». Мӧвпыс векджык ачыс локтӧ. Кодъяс висьтасьӧны, найӧс кывза, а сэтысь водзӧ темаыс сэсся петӧ.

l5h_OfhBQBU.jpg

qzyf7B3mXWE.jpg

– Тэ ӧд блогералӧм кындзи уналаӧ на босьтчан. Зэв зіль том морт. Неважӧн «Коми кыв онлайн» акция С.Я. Маршак нима челядьлӧн библиотекалы отсалін нуӧдны – вермысьяслы виртуальнӧй значок дизайн мӧвпыштін. Аттьӧ тэн век отсӧг вылӧ воӧмысь. Висьтышт, кытчӧ тэнӧ нӧшта кыскӧ, кутшӧм нырвизьын нӧшта уджалан?

– Менӧ кыскӧ спортӧ. Ас вылын уджала, мед винёлӧн лоны. Нӧшта кино снимайтны кыскӧ, серпасасьны кыскӧ.

– Генрих, тэ ӧд и гижан на. Том йӧзлы «Ы» литературнӧй журналын йӧзӧдчылін, лыддьылі, тӧда. Висьтышт, кӧн нӧшта петалісны гижӧдъясыд?

_iJtziZko7Q.jpg

– Менам медводдза кывбурыс петіс «Ас вӧр-ва» небӧгын. Сійӧн и мӧвпъясӧй йитчӧма Маршаковкакӧд. Сійӧ небӧгсӧ, казьтывсьӧ, меным козьналісны гожӧмын Маршак нима библиотекаын. Тайӧ небӧгас медводзсӧ йӧзӧдчылі, а сы бӧрын гижӧдъяс петавлісны «Ы» журналын, «Арт» бердын тай, «Войвыв кодзув» журналын, «Коми му» газетын. Со тадз, коми литературакӧд йитчӧм газет-журналын йӧзӧдчылі.

– Кӧн чужин? Кор воин карӧ? Кодӧ ӧні велӧдчан? Висьтышт сиктса да карса олӧм йылысь.

– Карас вои 7 во сайын, 11 ар мен сэк вӧлі. Искусство гимназияын художникӧ медводз велӧдчи, сэсся вуджи гуманитарнӧй юкӧн вылӧ. Ӧні вот дистанционнӧй велӧдчӧм вылын, сиктын. Нӧшта ӧні курсъяс прӧйдита. YouTube-ын менеджерӧн лоа. Сиктса олӧм йылысь кӧ висьтавны: начальнӧй классъяс тан, Кыдзкарын, помалі. Зэв ёна радейта ас сиктӧс. Изьва район ёна кажитчӧ. Карас локті ас могъясӧн. Ньӧж да вӧляӧн тіянкӧд тӧдмаси, том да версьтӧ гижысьяскӧд, журналистъяскӧд. Ӧні унакӧд нин тӧдса.

c91H3BFEwdI.JPG

– Кодӧн кӧсъян лоны? Кутшӧм ас водзад могъяс пуктін?

– Быдӧнлы висьтала, мый Мортӧн кӧсъя лоны. Сэтшӧм мог и пукта. Пыр мортӧн лоны. А сэсся олӧмыс петкӧдлас, кутшӧм профессия босьта, туйыс ӧд зэв уна да.

– Аслад нырвизь сертиыд код вылӧ мыджсян? Коді лоӧ тэныд «пример для подражания»-ӧн?

– Ставнысӧ висьтавны зэв дыр лоӧ. Мен медъёна Игорь Войтенко кажитчӧ – сійӧ спортивнӧй блогер. Сійӧ меным примерӧн и лоӧ.

adfUO12YAPw.jpg

0enB0MXMuUU.jpg

– Кыдзи матыссаясыд донъялӧны уджтӧ?

– Кажитчӧ тай уджӧй. Бабӧ тай постояннӧ прӧверяйтӧ, мед ӧшыбка эз ло видеоясын. Поддерживайтӧны быд ногыс.

– Мый радейтiн лыддьыны ичöтдыр кадö, мый öнi лыддян?

– Ичӧтӧн мойд да легендаяс кажитчисны. «Яг морт» унаысь лыддьылі. Ӧні медся бизнес литература да коми литература лыддя.

urVTZr97pTk.jpg

– Библиотека тэныд – тайӧ..?

– Тайӧ уна сикас бур небӧг. Зіля, мед аслам библиотека вӧлі, гортын. Бур библиотека, бур книгаясӧн. Разнӧй небӧг старайтча ньӧбны. Медбӧръяыс вӧлі Александр Шебыревлӧн «Фараон» книгаыс. Сэтшӧма кажитчис мен.

Мый сиан ставöнлы, код кутас тайö сёрнисö лыддьыны?

– Ме сиа ставныслы ӧтитор – мед водзджык водасны да водзджык сувтасны. Вот и всё. А нӧшта мед ассьыныс олӧм визьнысӧ пыр зілясны корсьны. Олӧм визьтӧ кӧ он аддзы, и олӧмас позьӧ вошны. А аддзасны да, кокньыдджык лоӧ овнысӧ, тӧдан сэсся, кытчаньӧ мунны, кыдз сӧвмыны.

ztvguB1UQY4.jpg

Сёрнитіс Алёна Нестерова