Ответьте нам

Друзья! В 2020 году исполняется 140 лет со дня рождения русского писателя Александра Степановича Грина (н. ф. Гриневский) (1880-1932). Знаете ли вы, как в повести-феерии «Алые паруса» называется корабль, капитаном которого является Грэй?

Napalkov.jpg

Олiс-вылiс Педöр нима мужик. Кöть и эз нин том вӧв, весь эз ов. Век мыйкö вöчис-зiлис: то пырта сувтöдас, то пес поткöдлас да тэчас, то куртас да сотас кос турун – лунтыр горт гӧгӧрыс ноксьӧ.

А тулыснас кутiс сiйö казявны, мый поводдя лунысь-лун лёкджык и лёкджык. То лунтыр зэрас, то лым усяс майын, то сэтшöм тöв ныр кыпöдчас, кöть кок йывсьыд нуас.

Пукалö Педöр öтчыд öшинь дорас, виччысьö зэрлысь помасьöм и мöвпалö:

– Мый нö тайö поводдяыскöд вöчсьö? Некыдз оз лэдз ывлаын уджавны. Мыйкö небеса-енэжас абу ладнö. Тадзи сэсся оз позь овны, мыйкö колö думыштны.

Кор зэрыс кобыштiс, Педöр мунiс вöрö да кералiс кузь вöсни пуяс. Найöс öтилаö йитiс. Артмис зэв кузь потш. Сэсся Педӧр вöчис дзик жӧ татшöм мӧд потш. На вылӧ тувъялiс уна-уна дженьыд вöсни чурка – артмис пос. Вель кузь пос – весиг синнад он аддзы мöдар помсö.

Сэсся Педӧр воліс гортас, босьтiс ыджыд ноп. Ноп пытшкас сюяліс пурт, чер, гез, истöг да кос нянь. Шыбитiс нопсö мыш вылас да бӧр муніс вӧрӧ. А ывлаын бара нин зэрö.

Nikitina.jpg

Педӧр босьтiс поссö, сувтöдiс – вöчöмторйыс нюжалiс дзик небесаöдз. Ньöжйöникöн тувччыштiс пос вылас да заводитiс кавшасьны.

Сiйö кайис лун дай мöд, воис дзик кымöръяс дорöдз. Найӧс вуджöм бöрын аддзис зэв югыд енэж. Видзöдлiс гöгöр да казяліс дзор тошка старикöс.

– Кодi тэ? – юалiс Педӧр.

– Ме – енэж видзысь. А тэ кодi?

– Ме, Педöр, мувывса коми мужик. Ме кöсъя аддзысьлыны поводдянас юралысьыскöд.

– Поводдянас юралысьыс миян Скöр Макей. Сы дорö бурджык не мунны.

– А ме мöда. Петкöдлан туйсö?

– Петкöдла, сӧмын юалöм вылö вочавидз.

– Но сідзкӧ, юась.

– Кодi асывнас ветлöдлӧ нёль кок вылын, луннас – кык кок вылын, а рытнас – куим кок вылын?

– Тайö дзик кокни. Морт.

– Тэ тай збыльысь зэв тöлка. На, босьт тупыльсӧ, сiйö тэныд туйсö петкöдлас.

– Аттьö, пӧльӧ.

И Педöр мӧдіс тупыль бöрся. Зэв дыр сiйö мунiс, куим лун дай куим вой. Казялiс, мый кымын матынджык сiйö Скöр Макей дорӧ, сымын поводдяыс лёкджык и лёкджык.

Другысь Педӧр джӧмдіс. Сы водзын сулалiс ыджыд морт, зэв скöр чужöма.

– Мый тэн колö? – юалiс мортыс.

– Ме корся Скöр Макейöс.

– Тэ сiйöс аддзин нин. Ме Скöр Макейыс.

– Ме мыйкӧ юавны тэнсьыд кӧсъя. Тэ верман поводдясö лöсьыдджыкöн вöчны?

Скöр Макей босьтчис серавны да шуис:

– Ме? Некор ог! Ха-ха-ха!

– Вай, сiдзкö, тышкасям. Кодi вермас – сiйö и поводдянас юравны мӧдас.

– Ладнö.

И заводитiсны тышкасьны. Скöр Макей вöлi кык пöв ыджыдджык Педӧрысь, да и кык пöв ёнджык. Вынтöммис коми мужик, но сетчыны абу окота. Дум вылас уси гезйыс, кодöс босьтiс аскöдыс. Кыскис нопсьыс сійӧс. Сэсся öдйö гартлiс Скöр Макейлысь коксӧ, кыскыштiс гезсö, и поводдяӧн юралысьыд грыпкысис-усис. Енэжыс весиг ставнас сырмунлiс.

– Но мый, Скöр Макей, ачыд му вылö поскöдыс лэччан либӧ тэныд отсавны? – юалiс Педӧр.

– Ачым, ачым.

Скöр Макей лэччис му вылö, а Педӧр кольччис енэжас, поводдянас юравны. Йöзыс сылы пуктiсны Перун ним.

Поводдяыс сэксянь тӧдчымӧн бурмис. Перун ыстывлiс зэрсö, сӧмын кор муыс ёна косьмылiс. Коми уджач йöз öнi вермисны и турун пуктыны, и пес пилитны, и гöрны-кöдзны… Кад сюрлiс и шойччыны. А Скöр Макей олö-вылö Педöр керкаын. Сылысь уджсö вöчö да овмöссö кутö. И нинöм вылö оз элясь.

Серпасыс Никитина Есениялӧн